Мова і правапіс

Я пісаў і пішу абодвума правапісамі: г.зн. клясычным, або тарашкевіцай і наркамаўкай, або сучасным. Часам трохі зьмешваю. Для абодвух ёсьць рэдактар для Ўорда, які можна бясплатна спампаваць. Не бачу праблемы з выкарыстаньнем абодвух - бо мы не для настаўніц сайт робім, а перш для сябе - як кажуць, каб самавыражоўвацца. Навязваць нешта некаму - не наша справа. Ў навінах ды "афіцыйных" тэкстах лепш каб памылак не было. Любым правапісам. А коменты рэдагаваць няма сэнсу. Ну і калі нехта лічыць, што ў яго лепш па-расейску атрымліваецца - я таксама такога чалавека разумею і ганьбіць ці навязваць беларускую мову не лічу патрэбным. Калі сур'ёзна пра правапісы, дык падставовая тут рэч як (праз якую мову) успрымаць іншамоўныя запазычаньні. Тарашкевіца падае іх як запазычаныя непасрэдна з захаду: лацінскай, польскай, нямецкай, ангельскай, грэцкай мовы - г.зн., збольшага, як і было насамрэч. А наркамаўка прапануе русіфікаваны варыянт, як бы мы запазычвалі ўсё праз усход. Г.зн. не Федаровіч іх друкаваць навучыў ды Капіевіч шрыфт грамадзянскі прапанаваў, а неяк наадварот - расейцы нас усяму навучылі і іншаземныя словы спачатку яны засвоілі, а потым мы ад іх даведаліся што і як. Таму гэта, калі падыходзіць глыбока, цывілізацыйны выбар - кім мы былі і куды ісці мусім.

Напэўна заўвага адносіцца да адносна статычнага тэксту, таму яна вартая ўвагі і вырашэння, а на форуме ды каментарах, кожны варты пісаць як яму падабаецца...