Шатландзкае прадстаўніцтва Каралеўскага таварыства абароны птушак (RSPB Scotland) заявіла афіцыйны пратэст супраць планаў пабудовы найвялікшай на тэрыторыі Шатландыі “фермы ветракоў” на Шэтландзкіх астравах.
Супольны праект кампаній The Viking Energy, Scottish і Southern Energy, а таксама уладаў вострава разлічаны на штогадовы прыбытак у памеры каля 37 мільёнаў фунтаў, на стварэнне шматлікіх месцаў працы дзякуючы пабудове і эксплуатацыі 150 ветраных турбін.
Цяпер RSPB Scotland дадало свой голас да пратэстаў мясцовай грамадзкасці супраць маштабнага будаўніцтва з-за магчымых негатыўных наступстваў для птушак. Сярод розных відаў птушак, якія могуць адказаць на будаўніцтва значным змяншэннем сваёй папуляцыі – залацістая сеўка.
Ллойд Осцін (Lloyd Austin), дырэктар па пытаннях аховы прыроды RSPB Scotland у сувязі з гэтым заявіў: "Мы вельмі цэнім папярэднія кансультацыі па дызайну /праектаваных турбін/ з кампаніямі-праектыроўшчыкамі і іх імкненне пазбегнуць будаўніцтва на ахоўваемых тэрыторыях. Аднак пасля аналізу поўных дадзеных пра плануемае /будаўніцтва/ мы ўпэўнены, што яно закране шматлікія віды птушак. Тым не менш, мы гатовы перагледзець сваю пазіцыю, калі спрэчныя пытанні будуць паспяхова развязаныя”.
John Muir Trust – арганізацыя па захаванню прыроднай і культурнай спадчыны астравоў, таксама заклікала мясцовых жыхароў пратэставаць супраць будаўніцтва. Ў сваёй афіцыйнай заяве трэст піша, што “ветраная ферма” значна закране каля адной пятай паверхні астравоў і назаўсёды зменіць іх выгляд. Бо ветракі будуць бачныя на адлегласці нават да 15 км. Пабудовы будуць дамінаваць над бязлесай паверхняй астравоў і фактычна знішчаць мясцовыя ландшафты. Трэст заклікаў прыкласці больш намаганняў для эканоміі энергіі, а не думаць толькі пра яе выпрацоўку.
На канец ліпеня больш за тры з паловай тысячы жыхароў Шэтландаў паставілі свае подпісы супраць будаўніцтва ветракоў.
Паводле www.news.bbc.co.uk падрыхтаваў Дзьмітры Вінчэўскі для www.BirdWatch.by
- Увайдзіце ці зарэгіструйцеся каб пакідаць каментары.
КАМЕНТАРЫ